風車草劇團一連21場的《三聖邨的Little Mermaid》音樂劇場於昨晚正式開鑼，劇團中的三位主腦：梁祖堯、湯駿業及邵美君，以及有份演出的韋羅莎、胡麗英及徐天佑，在昨日最後總綵排前與傳媒友好會面，分享了這次參與演出的心情。
梁祖堯與邵美君以老人妝示人，他們在劇中飾演一對賣魚的恩愛夫婦，在影相擺甫士時也大曬恩愛，阿祖透露二人的化妝未算太難搞，他說：「你見我肚凸凸，咪以為係特技化妝，係真嘢嚟！今次演老人家，要有啲肉地，終於唔使開Show前瘋狂減肥。劇場化妝唔同一般電影、電視劇特技化妝，所以個零鐘就化好。」同樣飾演一對情侶的還有湯駿業及胡麗英，AhDee指二人的演出是挑戰舞台劇的底線，而胡麗英今次扮演貴婦，她笑言：「過去成日都演性工作者，今次可以著得靚靚出嚟，要多謝阿祖！」至於扮演婦科醫生的韋羅莎，在劇中亦與AhDee及胡麗英有著千絲萬縷的關係，但她卻要大賣關子。天佑穿上一身賣魚佬的服飾，過去都有演過舞台劇的他，今次不用說對白，難度同樣高，天佑說：「冇得講嘢都好頭痛，因為要做出嚟，都幾得意，可以嘗試唔同嘅肢體語言，然後發現講唔到嘢真係好難，難過講到對白，所以都係一個好大嘗試。」
對於今次以三聖邨同埋美人魚作為故事主題，有份編劇的阿祖道：「今次揀三聖邨呢個地方作為故事發生嘅據點，係因為香港出名食海鮮嘅地方，大家可能諗起西貢、鯉魚門呢啲地方，但AhDee喺屯門長大，佢提議咗三聖邨，所以我哋為咗做資料搜集，都拉隊入咗去食咗幾次海鮮。至於今次終於將美人魚呢個瘋狂想法擺喺舞台上面，當中面對極大困難，但好有滿足感。」
《三聖邨的Little Mermaid》講述小美人魚擱淺在香港一個叫三聖邨的地方，在那裡她努力証明，愛和每一個意識，都是真實存在過！當遇上了在三聖邨的居民後，小美人魚與他們立了一份契約；時光飛逝，契約限期將至，原本寧靜安逸的三聖邨，將要刮起滔天巨浪⋯⋯原來，世界各地都流傳著一個古老的人魚傳說 ，「吃過人魚肉，就長生不老」。究竟擁有不老不死永遠的身體，是誘惑？還是詛咒？
(Copyright 2023 KTSF. All Rights Reserved. This material may not be published, broadcast, rewritten, or redistributed.)
版權所有，不得轉載。
