Cath去年年底都有在倫敦及曼徹斯特開Show，但今次將3月初在港的演唱會整個製作搬到當地，是Cath的首度嘗試，她說：「上次個場比較細有少少似Mini Gig ，今次真係一個正統嘅Show，將Blooming Underwater成個製作搬咗嚟英國同倫敦曼徹斯特朋友分享，意義層面更加強烈，後面孭住咗信念同成個Concept。」正式開Show，Cath都有為英國樂迷帶來驚喜，除了送上從未曝光、即將推出的單曲〈哀傷的作者〉外，她亦被樂迷的熱情而感動，在曼徹斯特唱到〈心的全部〉時，竟喊到唱不下去，不過台下樂迷的大合唱，為整個演出帶來了溫馨的場面。其實Cath過去在香港開Show，即使再感動的場面，她也堅持強忍淚水把歌唱完，但今次卻失守哭了，她自己也始料不及。
除了台上台下的互動讓Cath感動不已起雞皮，台下亦有令她起雞皮的時刻，Cath笑言：「後台冇冷氣，喺台上射燈射落嚟好熱，落到後台個人都仲係好熱，同事於是喺後台雪櫃拎支裝水出嚟，直接黐落我身體跟住Physically起雞皮。另一個起雞皮就係見到Fans遠道而來，當中有來自希臘亦有來自加拿大，其中希臘嚟嘅Fans，見到佢好感動，佢上年離開香港，走時都有叫佢俾心機讀書，要好好照顧自己，所以見面第一句就係問佢有冇俾心機讀書？有冇睇好自己嘅身體，好有一個探朋友嘅感覺。另外亦見到上年年底嚟英國見過嘅熟悉面孔，另外亦有新面孔，但都係講廣東話，喺異地Share住相同語言，好親密又好奇妙嘅感覺。」
英國Tour後，問Cath可會再考慮在外地開Show，她說：「想喺其他地方做Tour㗎！做live感覺好唔同，Fans都有講，聽Studio版本同Live睇我演出，歌曲嘅力度同之間嘅Connection係好唔同，每次去唔同地方唱歌俾大家聽，不論場地大細，我都知道有朋友有被感動到，我自己都喺佢地身上得到一啲力量而被感動，所以呢個感覺同關係我都好喜歡，好希望去唔同城市做Tour。今次係我攞一個Show去外地做，感覺係有趣同興奮，想有機會再一次去感受呢種感覺。」
(Copyright 2023 KTSF. All Rights Reserved. This material may not be published, broadcast, rewritten, or redistributed.)
版權所有，不得轉載。
